Joan den astelehenean, martxoaren 17an, Carolina Rueda ipuin kontalari kolonbiarrak bisita egin zigun, eta goizean zehar Zizur BHI-n egon zen DBHko 1. mailako ikasleekin aritzeko. Vázquez Montalbán aretoan munduko kultura eta txoko ezberdinetako narrazioak ezagutzera eman zizkigun, hala nola kondaira edo mitoa bezalako azpigenero narratiboak. Bere ahots eta keinuak baliatuz, entzule guztiak liluratzea lortu zuen. Lurreko lehen biztanleen, konkistatzaile bortitzen edo printze odoltsuen ahotsak beregain hartu zituen, eta horietako bat izango balitz bezala agertu zen.
