Errege sudurgorri

Aurkezpena:
“Errege sudurgorri” antzeslana, 2003-2004 ikasturtean Filosofia mintegiak 4. DC eta 3. G taldeekin eginiko proiektuaren emaitza da. Proiektua, Hezkuntza Jarduera Antolatuak irakasgaiari dagokion “Garapen pertsonala eta soziala” edukin blokearen barruan landu izan dugu.
Proiektu honetan, antzeslan txikia errepresentatzeko asmotan, “El rei que tenia el nas vermell” izeneko ipuin kataluniar herrikoia egokitu izan dugu, gaztelerara eta euskarara itzuli dugularik. Ipuinaren testuari gida didaktiko txikia gehitu diogu, hausnarketarako ideiak eta lanerako iradokizunak ematen dituena.
Ipuinaren antzespena (antolaturiko jardueren artean, nagusia), bere diseinu grafikoa, testuaren itzulpena, testua bera biltzen duen folletoa eta gida didaktikoa, drogei buruzko analisi eta hausnarketa prozesuaren ondorio dira. Horretarako lehenbizi drogen fenomenoa era orokorrean aztertu genuen eta gero gaur egungo gure gizartean legeztatuak eta onartuak diren hainbat sustantzien erabilera ere aztertu nahi izan genuen, zehazki alkoholak gure ohituretan duen presentzia eta sortzen dituen arazo larriak. Antzeslana maiatzaren 28an antzestu genuen DBHko 1. mailako ikasleen aurrean.
Beraz, jarduerak, oso dibertigarria izan arren, bazuen helburu serio eta garrantzitsua, alkohola gehiegi edateak sortzen ahal dituen arazo pertsonal eta sozialen inguruan kontzientzia hartzea, alegia. Ez dugu edatearen kriminalizazioa egin nahi izan, ezta mundu guztia abstemio bilakatzea ere. Arduratsu jokatzeko eskatzen dugu, ez besterik, eta horretarako alternativa osasungarriak eskaini.
Bestalde, azpimarratzekoa da, azken urte hauetan ohikoak izan diren beste proiektuetan bezalaxe (“Publizitate tailerra”, “Kerik gabe rap-a”, “AVE trenaren iragarkia”, “Ipuin batean bezala”, etab.), aurtengo proiektuaren atzean ere lan handia eta luzea dagoela, agerian bukaerako emaitza besterik ikusten ez bada ere.

Irakasgai bakoitzaren mugak hautsi eta zeharkako tratamentua eman diogu, jarrera edukinen inguruan batik bat, talde, maila, irakasgai eta irakasle ezberdinen arteko lana egin dugularik (Musika, Eremua, Gorputz Heziketa, Osasun Tailerra, etab.). H.J.A. irakasgaian aldiz, berariazko edukinak landu ditugu proiektuan zuzenean parte hartu duten 4. DC eta 3. G ikastaldeekin. Ez ditugu lerro hauetan proiektuaren xehetasun guztiak kontatuko aski nekagarria izanen bailitzateke, baina bai ordea alde ikusgarriena eta politena kontatuko dugu.

Antzeslana: “Errege sudurgorri”:

2003ko maiatzaren 28ko goizean zehar egin genuen, 2 orduko bi saioetan, DBHko 1. mailako ikasleei zuzendua bereziki (guztira 140 neska-mutil, 6 ikastaldetan banaturik). Ikasleez gain, euren irakasleak, tutoreak, zuzendaritza taldea, orientatzailea eta bestelako gonbidatu bereziak ere izan ziren bertan. Esate baterako, Drogei buruzko Foru Planaren zuzendari teknikoa eta Nafar Gobernuko Osasuna, Industria eta Hezkuntza Sailetako Kontsumo eta Hezkuntza Berrikuntzako atalburu zenbait ere etorri izan ziren.
Helburuak. Honako hauek:
· Alkoholaren inguruko oinarrizko kontzeptu batzuk ikasi: zertan datzan, zein den bere jatorria, bere eraginak edo ondorioak, nolako eragina duen gorputzean eta jokaeran, graduazioa, etab.
· Alkohola edatea eta gehiegi edatearen arteko ezberdintasunaz jabetzea.
· Gehiegi edatearen ondorio latzei buruz hausnarketa egitea.
· Hezkuntza jardunaldi ezberdina antolatzea, beste motatako ikasketak egiteko aukera ematen duena.
· Ongi pasatu eta elkar hobeki ezagutu, ikastalde, ikasmaila eta irakasgai ezberdinetakoak izanik ere.
· Alkoholaren alternatiba izan daitezkeen bestelako edari gozoak ezagutu eta dastatu.

Egitura. Saioa honela izan zen:

Programa eta parte hartzaileen aurkezpen laburra egin genuen lehenbizi. Horretarako ekitaldi osoaren nondik norakoak biltzen zituen esku egitaraua banatu zen. Ondoren, OMS erakundeak eginiko “A su salud” izenburuko bideoaren emanaldia izan zen. Jarraian, bideoan ageri diren hitz gakoen inguruko ideia zaparrada burutu genuen. DBHko 1. mailakoendako sariak ere banatu ziren.
Bigarren fasean gure lan nagusia, “Errege sudurgorri” antzeslana, antzestu zuten 4. DC eta 3. G taldekoek. Propio sorturiko musikaren laguntza ere izan zen, Batxilergo 2. mailako ikasleek osatutako “errege-orkestak” jo zuen eta.
Txalo zaparrada ondoren, publizitate parodia ere eskaini zuten ikasleek, “Chihuahua” abestiaren izena aldatuz “El agua!” kantatu baitzuten, ikusle guztion dantza eta koreografiaz lagunduta.
Txaloak jaso eta gero, ikusleen irriak lasaitu orduko, ipuinean azaltzen diren egoerak eta arazoei buruzko eztabaida egin zen.
Azkenik, 3. G taldeko ikasleek antolaturiko “Osasun Taberna”-k alkoholik gabeko hainbat edari gozo eta osasungarri dastatzeko aukera eman zigun, hala nola:
sorbete ezberdin eta anitzak, (limoi, laranja, jogurt, koko eta anana zaporezkoak), irabiatuak (txokolate, franbuesa, anana eta marrubia zaporezkoak), etxeko jogurt likidoak (melokotoi, marrubia eta banana zaporezkoak), izen erakargarrietako koktelak (“Canarias”, “Cinderella”, “Tutifruti”, etab.), eta, noski, ura!, iturriko ur garbi eta gardena.
Bukatzeko, jende guztiari eman zitzaion material didaktikoa (karpetak, folletoak, pin-ak, norberarendako alkoholimetroak, etab.) eta saioaren ebaluazioa egin zen. Parte hartu zuten guztiek (aktoreak, musikariak eta ikusleak, ikasle nahiz irakasleak) oso balorazio orokor ona egin zuten.